今晚世盃頭場有B組首輪賽事，由卡塔爾出戰瑞士。卡塔爾上屆世盃有地利都踢得咁差，近年發展又未見太大進步，今屆更難樂觀，相反瑞士近年喺大賽表現穩定，為免夜長夢多，必定想盡快解決卡塔爾，半場客勝有計。（Now 618及616周日凌晨3時直播）文:臻贏特
兩屆亞洲盃冠軍做炮灰
卡塔爾重金投資足球，喺2019及2023年連奪兩屆亞洲盃冠軍，有啲時勢造英雄感覺，睇番佢哋上屆世盃坐擁主場之利，喺分組賽3戰輸晒僅入1粒，全部上半場已經落後，刷新世盃主辦國史上最快出局同最低分東道主兩大恥辱紀錄，非常弱雞。佢哋今屆世盃外要踢到第4圈先出線，西班牙籍教頭盧比迪古上任後贏得2場咁大把，陣中除咗「爆炸頭」阿克林阿費夫外冇個標青，今屆冇埋地利等做炮灰。
相反，瑞士近年參加大賽演出穩定，之前3屆世盃及3屆歐國盃都殺入淘汰賽，既有經驗豐富嘅「大佬」格列沙加、文路爾艾簡治助陣，中生代如薩卡利亞、比列安保路亦愈踢愈好，最近仲彈起新星文森比，主力年齡分布平均。而且近2仗同亞洲球隊「拍跳」，大炒約旦四個一皮，上仗稍稍收油情況下打和澳洲，2場都半場領先，對住呢組實力最弱嘅卡塔爾，實行玩速戰速決，半場客勝玩得過。